RKÍ sendir þrjár milljónir til hjálparstarfs í Kenía

Rauði kross Íslands hefur sent þrjár milljónir til hjálparstarfs í Kenía vegna átakanna sem brutust út milli þjóðarbrota í landinu í kjölfar forsetakosinganna skömmu fyrir áramót.

Fram kemur í tilkynningu frá Rauða krossinum að féð renni í neyðarbeiðni Alþjóða Rauði krossins sem hefur óskað eftir um 840 milljónir króna til að aðstoða þá sem eiga um sárt að binda.

Eins og fram hefur komið í fréttum er talið að hundruð manna hafi fallið í átökum í landinu í kjölfar forsetakosninganna og ekki sér fyrir endann á átökunum. Þá hafa tugir þúsunda hafa neyðst til að flýja heimili sín.

Alþjóða Rauði krossinn sendi út sérstaka neyðarbeiðni vegna þessa og jafnframt hefur verið sendur fjöldi hjálparstarfsmanna til að aðstoða fórnarlömb átakanna og vinna að dreifingu matvæla og annarra hjálpargagna ásamt sjálfboðaliðum Rauða krossins.

Fyrstu aðgerðir Alþjóða Rauða krossins felast í því að útvega fórnarlömbum átakanna matvæli, búsáhöld, vatn og hreinlætisaðstöðu. Alls er stefnt að því að sjá um 100 þúsund manns fyrir aðstoð um nokkurra vikna skeið.

Rauði krossinn í Kenía mun dreifa hjálpargögnunum á næstu dögum og fær aðstoð við að sameinina fjölskyldur sem hafa sundrast og leita að týndu fólki. Alþjóða Rauði krossinn dreifir einnig sjúkragögnum og lyfjum til sjúkrastofnana til að gera þeim kleift að hlúa að þeim sem særst hafa í átökunum. Aukið magn sjúkragagna hefur þegar verið sent til Keníu.

Rauða kross hreyfingin er viðbragðsstöðu ef mannúðarástand versnar enn en þess má geta að einn sendifulltrúi Rauða kross Íslands, Ómar Valdimarsson, er við störf í landinu.