Innlent

Staðlað eyðublað vegna meðmælenda tilbúið

Forseti Íslands, Ólafur Ragnar Grímsson, hefur gefið það út að hann sé reiðubúinn að sitja eitt kjörtímabil í viðbót fái hann til þess stuðning frá þjóðinni.
Forseti Íslands, Ólafur Ragnar Grímsson, hefur gefið það út að hann sé reiðubúinn að sitja eitt kjörtímabil í viðbót fái hann til þess stuðning frá þjóðinni. MYND/Hrönn

Dóms- og kirkjumálaráðuneytið hefur látið hanna staðlað eyðublað fyrir þá sem hyggjast safna meðmælendum fyrir forsetaframboð. Þetta kemur fram á vef dómsmálaráðuneytisins. Þar segir einnig að meðmælendur skuli rita með eigin hendi á eyðublaðið en tekið er fram að meðmæli séu gild þótt þau berist ekki á eyðublaðinu.

Forsetakjör fer fram síðasta laugardag í júnímánuði samkvæmt lögum sem þýðir að forsetakosningar fara fram 28. júní í ár ef tveir eða fleiri bjóða sig fram í sumar. Eigi síðar en þrem mánuðum fyrir kjördag, þ.e. ekki seinna en 28. mars, skal forsætisráðherra auglýsa kosninguna í útvarpi og Lögbirtingarblaðinu og tiltekur þá hámarks- og lágmarkstölu meðmælenda forsetaefnis úr hverjum landsfjórðungi í réttu hlutfalli við kjósendatölu þar.

Frambjóðendur þurfa að tilkynna um framboð sitt eigi síðar en fimm vikum fyrir kjördag, þ.e. 24. maí 2008, en framboðinu skal fylgja nægilegur fjöldi meðmælenda og vottorð yfirkjörstjórna um að frambjóðandi sé kosningabær. Innan viku frá því ráðuneytið fær þær upplýsingar á að auglýsa í útvarpi og Lögbirtingablaði hverjir séu í kjöri til forsetaembættisins og afgreiða til hæstaréttar áðurnefnd skjöl.

Ef aðeins einn frambjóðandi er í kjöri er hann réttkjörinn án atkvæðagreiðslu enda fullnægi hann kjörgengisskilyrðum. Komi hins vegar til kosningar milli tveggja eða fleiri manna sér dóms- og kirkjumálaráðuneytið um gerð og prentun kjörseðla og dreifir þeim.

Fyrir þá sem ganga með forseta í maganum er hægt að nálgast eyðublöð hér.

Mest lesið


Fleiri fréttir

Sjá meira


×

Mest lesið