Ástþór neitar að staðfesta framboð

Ástþór Magnússon vill ekki staðfesta fréttir um að hann hyggist bjóða sig aftur fram til forseta. Hann ætlar sér að ræða við fréttamenn um málið um miðjan mánuðinn.

Fyrrum kosningastjóri Ástþórs sagði í samtali við Vísi í fyrradag að Ástþór hyggist bjóða sig fram til forseta Íslands í sumar. Í samtali við fréttstofu Stöðvar 2 í morgun vildi Ástþór ekki staðfesta að hann ætlaði að bjóða sig aftur fram til forseta en neitaði því ekki heldur. Ástþór er staddur erlendis og sagðist hann ekki hafa tíma til að ræða málið á þessari stundu við fréttamenn en það myndi hann hins vegar gera þegar hann kæmi til Íslands um miðjan mánuðinn. Eftir að hafa tjáð fréttamanni það slitnaði símtalið og ekki reyndist unnt að ná sambandi við hann aftur.

Ástþór hefur tvisvar boðið sig fram til forseta, árið 1996, þegar Ólafur Ragnar Grímsson náði kjöri, og svo aftur árið 2004. Í kvöldfréttum Stöðvar 2 í gær sagði Þórunn Guðmundsdóttir, fyrrverandi oddviti yfirkjörstjórnar í Reykjavíkurkjördæmi norður, Ástþór Magnússon misnota lýðræði með því að bjóða sig ítrekað fram til forseta og vill hún að reglur verði settar til að koma í veg fyrir slíkt. Svo sem með því að breyta ákvæði stjórnarskrárinnar um fjölda meðmælenda forsetaframbjóðenda. Þórunn vill einnig að sérstök eyðublöð verði útbúin fyrir meðmælendalista frambjóðenda svo ekki fari á milli mála þegar fólk skrifar undir slíka lista hvað það er að skrifa undir. Þórunn sagði meðmælendalista Ástþórs í síðustu kosningum hafa verið óskýra og kjósendur jafnvel talið sig vera að skrifa undir friðarboðskap en ekki undir stuðningsyfirlýsingu við Ástþór.

Hjá Dómsmálaráðuneytinu fengu þær upplýsingar að þar séu menn að velta fyrir sér að búa til fyrirmynd af meðmælendalistum en frambjóðendur ráði sjálfir hvort þeir noti þá fyrirmynd.

Í fjárlögum þessa árs er gert ráð fyrir rúmlega hundrað og sjötíu milljón króna útgjöldum vegna forsetakosninganna næsta sumar.