Um 130 leita Jakobs og fleiri leitarmenn væntanlegir

Um 130 björgunarsveitarmenn leita nú að Jakobi Hrafni Hökuldssyni, 19 ára pilti sem saknað hefur verið í Reykjavík frá því í gærmorgun.

Í tilkynningu frá Landsbjörgu kemur fram að leitin hafi enn engan árangur borið en von er á fleiri björgunarsveitarmönnum frá Akranesi, Suðurnesjum og Árborg.

Leitin beinist að svæðinu í kringum Elliðaár og hverfum þar í kring. Fjörur eru gengnar, notaðir eru bátar, leitarhundar og kafarar frá Slysavarnafélaginu Landsbjörg eru að störfum. Þeir leita í Elliðaánum allt frá gömlu rafstöðinni og niður að Geirsnefi.

Síðast sást til Jakobs við skemmtistaðinn Broadway við Ármúla um klukkan hálfsex að morgni nýársdags en þá hugðist hann halda heim á leið, í Blöndukvísl í Árbæjarhverfi.

Jakob er 188 sentímetrar ár hæð, frekar grannur með dökkt stutt hár, í dökkum buxum, hettupeysu og með derhúfu. Lögregla biður fólk sem gæti gefið upplýsingar um ferðar hans að hafa samband í síma 444-1000.