Kafarar leita að pilti í og við Elliðaárnar

Kafarar á vegum björgunarsveitanna á höfuðborgarsvæðinu leita nú að 19 ára pilti, Jakobi Hrafni Höskuldssyni, í Elliðaánum og við árnar en hans hefur verið saknað frá því í gærmorgun. Leitað er í ánum allt frá gömlu rafstöðinni og niður að Geirsnefi.

Að sögn Ólafar Snæhólm Baldursdóttur, upplýsingafulltrúa Landsbjargar, er einnig leitað í Elliðaárdalnum sjálfum með aðstoð hunda og þá er einnig leitað á sjó.

Síðast sást til piltsins við skemmtistaðinn Broadway við Ármúla um klukkan hálfsex að morgni nýársdags en þá hugðist hann halda heim á leið, í Blöndukvísl í Árbæjarhverfi.

Að sögn Ólafar hafa fáar vísbendingar fundist um ferðir Jakobs en leit verður haldið áfram í allan dag ef þurfa þykir. Um hundrað björgunarsveitarmenn hafa komið að leitinni að Jakobi frá því í nótt.

Jakob er 188 sentímetrar ár hæð, frekar grannur með dökkt stutt hár, í dökkum buxum, hettupeysu og með derhúfu. Lögregla biður fólk sem gæti gefið upplýsingar um ferðar hans að hafa samband í síma 444-1000.