Segir gatnamót Fellsmúla og Háaleitisbrautar slysagildru

Foreldrara í Fellsmúla í Reykjavík vilja frekar keyra börnin sín nokkur hundruð metra í Álftamýraskóla en láta þau ganga yfir gatnamót Fellsmúla og Háleitisbrautar. Móðir segir gatnamótin vera slysagildru en keyrt var á son hennar þar fyrir nokkrum vikum.

Börn sem búsett eru í Fellsmúla og sækja Álftamýraskóla þurfa að fara yfir gatnamót Háleitisbrautar og Fellsmúla til að komast leiðar sinnar. Vandamálið er að á sama tíma og bílar sem eru að koma frá Fellsmúla fá grænt til að keyra yfir gatnamótin kviknar líka á grænu ljósi fyrir gangandi vegfarendur hér fyrir aftan mig. Ökumenn sem taka vinstri beygju inn á Háaleitisbraut átta sig ekki alltaf á þessu.

Heiða Björk Sævarsdóttir á þrjá syni í Álftamýraskóla. Hún segir að margir foreldrar kjósi frekar að keyra börnin sín í skólann sem er aðeins í nokkur hundruð metra í burtu frekar en leyfa þeim að ganga.

„Það er svona einn og hálfur mánuður síðan þá var keyrt á minn fjórtán ára á þessari gangbraut. Hann slapp vel og slasaðist ekki neitt en aftur fyrir jól þá var hún Elma Lísa sem tvíhandleggsbrotnaði á þessum sömu gatnamótum. Það hefur verið keyrt á mig hérna, verið keyrt á kerru sem ég var að keyra yfir gatnamótin. Það er það sem við vitum en hvað hefur verið keyrt á mörg börn sem við vitum ekki," segir hún.

Um 200 foreldrar í Fellsmúlanum skrifuðu undir áskorun til borgarstjóra á síðasta ári þar sem hvatt var til þess að gatnamótunum yrði breytt. Heiða segir að eftir að nýr meirihluti tók við hafi málið hins vegar týnst í kerfinu. „Það er setið á þessum peningum. Hann Dagur lét eyrnamerkja okkur peninga í þetta verkefni en svo þegar tóku nýir við þá er ekkert að gerast," segir Heiða og spyr: „Ætlum við að byrgja brunninn þegar einhver er dáinn á þessum gatnamótum eða viljum við gera eitthvað áður en það gerist."