Enn réttað í TR-fjársvikamáli

Fyrirtaka var í morgun í hinu umfangsmikla fjársvikamáli sem upp komst í Tryggingastofnun Ríkisins. Höfuðpaurinn í því máli er 45 ára fyrrverandi starfsmaður TR sem grunuð er um að hafa stolið 76 milljónum króna úr sjóðum stofnunarinnar og komið til vina og vandamanna.

Alls voru 20 ákærðir vegna málsins en þáttur tveggja hefur þegar verið gerður upp.

Þrítugur karlmaður fékk átta mánaða fangelsi og 52 ára kona var dæmd í sex mánaða skilorðsbundið fangelsi fyrir aðild sína að málinu.

Maðurinn hafði milligöngu um að taka við og dreifa um níu milljónum króna sem hann fékk inn á bankareikning frá höfuðpaurnum en konan tók á móti um sjö milljónum króna inn á reikning sinn.