Telur námið ekki hindra sig í störfum varaforseta

„Það var samdóma álit mitt og Hönnu Birnu Kristjánsdóttur að ég gæti gegn störfum 2. varaforseta þrátt fyrir að ég væri í námi erlendis," segir Gísli Marteinn Baldursson borgarfulltrúi. Hann segir að Hanna Birna Kristjánsdóttir þekki vel starf 2. varaforseta eftir að hafa gegnt starfi forseta borgarstjórnar. „Ég hefði alls ekki verið að taka að mér þetta verkefni ef ég teldi mig ekki geta sinnt því sómasamlega," segir Gísli Marteinn í samtali við Visi.

Á vef sínum segir Gísli Marteinn að ef haldnir verði fundir þegar hann sé ekki viðstaddur, sé einfalt mál að hafa sig með í gegnum síma, eins og hafi reyndar oft gerst í forsætisnefnd hingað til. Þá segir Gísli að skrifstofustjóri borgarstjórnar, sem jafnframt sé framkvæmdastjóri nefndarinnar, segi sér að þetta fyrirkomulag sé vandkvæðalaust.

Vilhjálmur Þ. Vilhjálmsson, nýkjörinn forseti borgarstjórnar vísar á Hönnu Birnu Kristjánsdóttur borgarstjóra um mál Gísla Marteins. Sjálfur segist Vilhjálmur ætla að leggja sig allan fram um að rækta hlutverk sitt sem forstjóra borgarstjórnar í samráði við oddvita allra flokkanna.