Ólafur hefur ekki fengið vilyrði fyrir neinni stöðu hjá frjálslyndum

Ólafur F. Magnússon, fyrrverandi borgarstjóri, hefur ekki sent beiðni um inntöku í Frjálslynda flokkinn og formaður flokksins hefur ekki gefið honum vilyrði fyrir neinni stöðu innan hans. Þetta segir Jón Magnússon, þingmaður Frjálslynda flokksins, á heimasíðu sinni í dag.

Ólafur tilkynnti á blaðamannafundi á þriðjudag að hann hygðist aftur ganga til liðs við frjálslynda og að hann hefði rætt við Guðjón Arnar Kristjánsson, formann flokksins, sem styddi ákvörðunina. Fram hefur komið að Ólafur vilji leiða flokkinn í næstu borgarstjórnarkosningum.

Jón Magnússon segir á bloggi sínu að Guðjón Arnar hafi nú greint honum og formönnum kjördæmafélaga Frjálslyndra í Reykjavík frá því að hann hafi aldrei gefið Ólafi F. Magnússyni vilyrði fyrir einni eða neinni stöðu innan Frjálslynda flokksins, ef hann gengi í flokkinn, ,,hvað þá heldur að Ólafur hafi fengið ádrátt um að leiða lista við næstu borgarstjórnarkosningar," segir Jón.

Hann segir því allt tal Ólafs um annað sé ekki samkvæmt sannleikanum. ,,Guðjón hefur þannig svarað þeirri spurningu afdráttarlaust sem ég sagði að hann þyrfti að gera á blogginum mínu í gær," segir Jón enn fremur.

,,Af sjálfu leiddi að Guðjón Arnar gat ekki hafa gefið þær yfirlýsingar sem Ólafur F. heldur fram að hann hafi gefið en vegna ítrekaðra ummæla Ólafs F. var nauðsynlegt að Guðjón Arnar gæfi þessa ótvíræðu yfirlýsingu.

Ólafur F hefur opinberlega sagst ætla að ganga í Frjálslynda flokkinn en hefur ekki sent inntökubeiðni þegar þetta er ritað tveim dögum eftir opinberu yfirlýsingu sína svo vitað sé. Óalfur F er því ekki félagi í Frjálslynda flokknum," segir Jón að lokum.