Fjölmargir gerðu sér dagamun í Reykjavíkurborg

Á annað hundrað manns, börn og fullorðnir, nutu leiðsagnar Snigils Njósnadvergs úr Skilaboðaskjóðunni um sýningar í Listasafni Reykjavíkur í Hafnarhúsinu fyrsta vetrardag. Leiðsögnin var liður í fjölskyldudagskrá Reykjavíkurborgar undir yfirskriftinni Gerum okkur dagamun. Hátt á þriðja þúsund manns höfðu lagt leið sína í Fjölskyldu- og húsdýragarðinn og Skautahöllina um miðjan dag. Fullt var út úr dyrum á tónleikum Englakórs Nataliu Chow á Kjarvalsstöðum. Fjölmargir lögðu leið sína í sundlaugar borgarinnar og á listasöfn.

Boðið upp á frían aðgang að Fjölskyldu- og húsdýragarðinum, sundlaugum og söfnum borgarinnar. Af fjölbreyttum dagskrárliðum má nefna fjölskylduratleik á Landnámssýningunni í Aðalstræti, Vatnslitastúdíó, fríar ferður út í Viðey, dótadag í sundlaugum og dagskrá um Fíusól á Borgarbókasafni.