Latabæjarhlauparar geta tryggt 1500 vestur- afrískum börnum menntun

Hátt í 3.700 börn tóku þátt í Latabæjarhlaupi Glitnis sem haldið var á svæðinu fyrir framan Háskóla Íslands í dag. Þátttökugjöld runnu óskipt til UNICEF, Barnahjálpar Sameinuðu Þjóðanna, og söfnuðust hátt í 3 milljónir króna. Birna Einarsdóttir, framkvæmdastjóri viðskiptabankasviðs Glitnis, afhenti Þórunni Sigurðardóttur, stjórnarformanni UNICEF, söfnunarféð á háskólasvæðinu.

Birna segist dást af því hvað krakkar og foreldrar hafi látið rigninguna lítið á sig fá. ,,Það var tilkomumikil sjón að sjá alla þessa smáu en knáu hlaupara saman komna fyrir framan Háskóla Íslands. Með þátttöku sinni í hlaupinu lagði hver og einn í hópi hlaupagarpanna sitt af mörkum til bágstaddra barna í fjarlægum löndum. Við kunnum börnunum og foreldrum þeirra kærar þakkir," segir Þórunn Sigurðardóttir, stjórnarformaður UNICEF á Íslandi, í fréttatilkynningu frá aðstandendum hlaupsins.

UNICEF segir að fyrir söfnunarféð úr Latabæjarhlaupinu sé til dæmis mögulegt að bólusetja rúmlega 120 þúsund börn gegn mænusótt. Þannig megi koma í veg fyrir dauða eða örkuml. Fyrir þessa upphæð sé líka unnt að tryggja 1.500 krökkum í Vestur-Afríku menntun.