Í haldi fyrir að hafa kveikt í tjöldum í Eyjum

Maður situr í fangelsi í Vestmannaeyjum grunaður um að hafa kveikt í tjöldum þjóðhátíðargesta í Herjólfsdal í gærkvöldi. Slökkvilið slökkti í fjölda tjalda á svæðinu í gærkvöldi og reykurinn var svo mikill að fólk átti erfitt um andardrátt. Enn er haldið uppi loftbrú milli lands og Eyja til að koma ferðalöngum til meginlandsins.

Ekki komust allir til síns heima í gær frá Vestmannaeyjum. Um eitt þúsund manns voru í Herjólfsdal í nótt. Upp úr klukkan 11 í gærkvöldi var farið að loga í tjöldum í dalnum. Hvítur reykur liðaðist um dalinn í logninu og átti fólk erfitt með andardrátt.

Maður gekk um og bar eld að tjöldum sem höfðu verið skilin eftir og einnig þar sem eigendur höfðu brugðið sér frá. Lögregla og slökkvilið var kallað út og var búið að slökkva eldinn í tjöldunum upp úr klukkan 2 í nótt. Vakt var í Herjólfsdal í alla nótt.

Þrátt fyrir loftbrú milli lands og Eyja í gær tókst ekki að koma öllum upp á land. Herjólfur fór með um 500 manns frá Eyjum í morgun og Flugfélag Vestmannaeyja heldur uppi flugi í allan dag upp á Bakka. Flugfélag Íslands fer 4 til 5 ferðir frá Eyjum í dag.

Tveir sátu í fangageymslu lögreglu í nótt, einn fyrir íkveikjur og annar fyrir ölvun og óspektir.