Framboð Ástþórs sagt nauðgun á lýðræðinu í landinu

Þórunn Guðmunsdóttir, hæstaréttarlögmaður og fyrrverandi oddviti yfirkjörstjórnar í Reykjavík norður, segir að framboð Ástþórs Magnússonar til forseta sé nauðgun á lýðræðinu í landinu.

Þórunn segir í samtali við Vísi að eftir síðustu forsetakosningar árið 2004 hafi sér verið svo ofboðið að hún sendi dómsmálaráðherra bréf um kosningarnar.

Í bréfi þessu segir m.a. að hún vilji taka hjartanlega undir með þeim sem hafa bent á að fjölga þurfi meðmælendum forsetaefna. Einnig sé hálf önugt að hlutfall meðmælenda skuli vera eftir landsfjórðungum en ekki kjördæmum.

Megnið af bréfinu er hins vegar hörð gagnrýni á vinnubrögð Ástþórs og stuðningsmanna hans við að afla meðmælenda. Meðal annars nefnir Þórunn sem dæmi að meðmælalistar Ástþórs hafi ekki verið allir eins. Á einum þeirra hafi verið texti efst um að forsetinn ætti að gegna forystuhlutverki í friðarmálum heims. Undir þessari yfirlýsingu var svo með mun smærra letri texti um að viðkomandi mælti með framboði Ástþórs.

Síðan segir í bréfinu að eftir að vottorð yfirkjörstjórnar var gefið út: „hafði samband við mig fólk, sem sagði mér að það hefði skrifað undir þessa lista og taldi sig vera að samþykkja friðarboðskap, en ekki að mæla með framboði Ástþórs Magnússonar. Auðvitað ber hver og einn ábyrgð á því sem hann skrifar undir, en ég tel að gera þurfi ákveðnar kröfur til meðmælendalistanna, þannig að kjósendur láti ekki blekkjast."

Þórunn segir í samtali við Vísi að það sé löngu orðið tímabært að endurskoða lög og reglur um forsetakosningarnar. „Árið 1944 þegar lögin voru sett og ákveðið að meðmælendur yrðu 1.500 talsins var þjóðin helmingi fámennari en nú er," segir Þórunn.