Stal ekki dínamíti en fékk það lánað

Miskilningur olli því að sá kvittur komst á kreik á Kárahnjúkum að átta tonnum af sprengiefni hefði verið stolið á vinnusvæðinu við Hraunaveitu.

Óskar Bjartmarz, yfirlögregluþjónn hjá lögreglunni á Egilsstöðum, segir að engu sprengiefni hafi verið stolið en á Vísi í gærkvöldi var greint frá því að átta tonn af dínamíti hafi verið tekin ófrjálsri hendi á föstudagskvöldið.

„Ekki var um þjófnað að ræða," segir Óskar. „Maður kom á svæðið og tók efnið sem hann taldi sig hafa fengið að láni. Hann sótti hins vegar ekki um heimild til að flytja efnið sem honum ber skylda til að gera."

Óskar segir að lögregla hafi farið í málið á laugardeginum og haft upp á manninum og efninu. Hins vegar hafi komið upp sá kvittur á svæðinu að efnunum hafi verið stolið.

Að sögn Óskars fær maðurinn væntanlega á sig kæru fyrir að flytja sprengiefni án tilskilinna leyfa.