Ganglimir brugðust

Lögreglan í Vestmannaeyjum hafði í mörg horn að líta í vikunni sem leið enda töluverður fjöldi fólks í bænum í tengslum við Goslokahátíð. Að sögn lögreglu fór hátíðin að mestu leiti vel fram. Eitthvað var um pústra en engar kærur liggja fyrir.

Þá þurfti lögreglan að aðstoða nokkra gesti hátíðarinnar til síns heima þar sem ganglimir létu ekki að stjórn.

Einn fékk að gista fangageymslur lögreglu eftir skemmtanahald helgarinnar en hann hafði verið ölvaður og með óspektir í Skvísusundi.

Þrjú eignaspjöll voru tilkynnt til lögreglu í vikunni sem leið. Að kvöldi 1. júlí sl. var tilkynnt um að þrír ungir drengir væru að gera sér það að leik að slá golfkúlur í klæðningu Íþróttahússins. Rætt var við drengina og foreldra þeirra og lofuðu þeir að gera þetta ekki aftur.

Að kvöldi 3. júlí sl. var tilkynnt um skemmdir á vinnuvél sem stóð vestan við Týsheimilið en rúður í vélinni höfðu verið brotnar. Sást til barna við vélina sem voru að kasta í rúðurnar en hins vegar er ekki vitað um hvaða börn voru þarna að leik.

Að morgni 5. júlí sl. var tilkynnt um rúðubrot í húsi slökkvistöðvarinnar og að sést hafi til manns sem braut rúðuna í reiðikast.

Af umferðarmálum er það helst að frétta að einn ökumaður var stöðvaður vegna gruns um ölvun við akstur. Þá fengu fimm ökumenn sekt fyrir að hafa ekki öryggisbeltið spennt í akstri. Auk þess fékk einn sekt fyrir að vera með of marga farþega og einn aðili fékk sekt fyrir að fela manni akstur ökutækis án þess að sá hinn sami hefði ökuréttindi.