Tjón í bruna í Eyjum hleypur hugsanlega á milljónum

Grunur leikur á að kveikt hafi verið í sviðsbúnaði þjóðhátíðar Vestmannaeyja undir morgun með þeim afleiðingum að hann skemmdist töluvert.

Búnaðurinn er geymdur í porti við áhaldahús bæjarins við Heiðaveg, rétt hjá slökkvistöðinni í bænum. Vegfarandi tilkynnti lögreglu um mikinn reyk frá portinu og var slökkviliðið kallað út. Töluverður eldur logaði þegar að var komið en slökkvistarf gekk vel.

Þrátt fyrir það eyðilagðist litla sviðið þar sem gömlu dansarnir hafa verið stignir, sömuleiðis myllan og hluti af skyggni stóra sviðsins. Talið er að tjónið hlaupi jafnvel á milljónum króna, en það hefur ekki verið metið endanlega.

Eyjamenn segja að það sé lán í óláni að þestta skulil hafa gerst núna, því nægur tími sé til að endursmíða það sem eyðilagðist og gera klárt fyrir þjóðhátíðina. Eldsupptök eru ókunn en meðal annars er rannsakað hvort um íkveikju hafi verið að ræða.