Ólafur formlega búinn að sækja um inngöngu

Ólafur F. Magnússon, fyrrverandi borgarstjóri, gekk skriflega frá inngöngu sinni í Frjálslynda flokkinn í dag. Hann ætlar að berjast fyrir því að leiða flokkinn í næstu borgarstjórnarkosningum.

„Það var sótt eftir því að ég myndi sækja um inngöngu með þessum hætti," segir Ólafur en bætir við að hann hafi reyndar aldrei formlega sagt sig úr flokknum né hafi hann skráð sig formlega í Íslandshreyfinguna.

Ástæðan fyrir því að Ólafur gekk ekki formlega aftur til liðs við Frjálslynda flokkinn fyrr en nú er að sögn Ólafs sú von hans að fá Íslandshreyfinguna til að lýsa formlega yfir samstarfi við Frjálslynda. „Það er svo sannarlega mín von og barátta að óháðir styðji Frjálslynda flokkinn í næstu borgarstjórnakosningum og að Íslandshreyfingin beri gæfu til að bjóða ekki fram. Það er aðalatriðið að atkvæðin á bakvið það að Reykjavíkurflugvöllur fari ekki til Keflavíkur dreifist ekki í næstu kosningum."

Ólafur segir að borgarstjórnarflokkur F-lista standi nú þétt saman og kjarni hans muni starfa ötullega að þeim málefnum sem flokkurinn stóð fyrir við síðustu kosningar.

Ólafur segist jafnframt gera sér grein fyrir að það sé ekki sjálfgefið að hann leiði flokkinn í næstum kosningum en hann vilji berjast fyrir þeirri tilnefningu. „Það eru hins vegar ýmsir sem tala um að þeir vilji leiða F-listann í næstu borgarstjórnarkosningum. Reyndar misjafnlega ljóst og líka misjafnlega leynt en sumir þessir aðilar eru ekki einu sinni sammála stefnu F-listans í flugvallarmálinu sem var helsti grundvöllur stórsigurs F-listans í síðustu kosningum."