Kaupþing með þrjá landsliðsþjálfara á launum

Kaupþing mun skoða hvort hægt verði að veita þjálfara íslenska handboltalandsliðsins leyfi áfram til þess að gegna þjálfarastörfum óski hann eftir því. Þetta segir Svali H. Björgvinsson starfsmannastjóri bankans.

Samningur Guðmundar Þ. Guðmundssonar landsliðsþjálfara við Handknattleikssamband Íslands náði fram yfir Ólympíuleikana. Óljóst er hvort hann haldi áfram. Hann starfar sem verkefnisstjóri hjá Kaupþingi en hefur fengið leyfi frá störfum til að sinna verkefnum fyrir landsliðið.

„Ég geri ráð fyrir að við skoðum þetta, en ég held að við förum hvorki að pressa á hann af eða á," segir Svali í samtali við Vísi. Hann bendir á að nokkuð langt sé í næsta stórverkefni landsliðsins og því kannski ekki tímabært að hugsa um þetta. „Svo er þetta ekki eins og hann hafi alltaf verið í fríi. Hann hefur sinnt sínum verkefnum hér vel samhliða þessu," segir Svali.

Svali bendir á að Guðmundur sé ekki eini þjálfarinn sem starfi hjá Kaupþingi. „Júlíus Jónasson kvennalandsliðsþjálfarinn er hérna og Óskar Bjarni aðstoðarlandsliðsþjáfari er hérna líka," segir Svali. Hann bendir á að þeim, jafnt sem öðrum íþróttamönn sem starfi hjá bankanum, hafi verið sýndur skilningur þegar þeir hafi þurft frí.