Árekstrarvari fór í gang í vél Icelandair

Flugmenn Icelandair þotu, sem var í aðflugi að Kennedy flugvelli á fimmtudag, þurftu skyndilega að hækka flugið þar sem árekstrarvari flugvélarinnar gaf til kynna of mikla nálægð við aðra flugvél.

Skömmu síðar var aðfluginu haldið áfram og lent eins og ekkert hefði í skorist. Atvik sem þessi eru tilkynningaskyld og hefur félagið sent viðkomandi tilkynningu um það. Þar kemur hinsvegar ekki fram hvaða vél var of nálægt Icelandair vélinni né hversu nálægt vélarnar voru hvor annarri.

Atvik sem þetta henda íslenskar vélar nokkrum sinnum á ári hér og þar í heiminum, og dæmi eru um svona tilvik yfir Íslandi. Mismunandi er hversu mikil hætta var á ferðum og mismunandi er hversu rækilega flugmálayfirvöld á viðkomandi stöðum rannsaka hvert atvik, en skýrsla Icelandair um þetta atvik hefur meðal annars verið send flugvallaryfirvöldum á Kennedy flugvelli.

Icelandair vélin var í áætlunarflugi með hátt á annað hundrað manns um borð.