Hreinræktuðum hundum stolið til undaneldis

Íslenski fjárhundurinn Prins frá Miðengi í Grímsnesi, sem við sögðum frá í morgunfréttum að horfið hafi sporlaust á laugardag, er kominn fram. Dæmi eru um að hreinræktuðum hundum sé stolið til undaneldis.

Ónefndur maður kom með hann til eigandans, sagðist hafa fundið hann á flækingi og áveðið að hafa hann í sinni vörslu þar til eigandinn færi að auglýsa eftir honum. Hann snéri sér hinsvegar ekki til lögreglunnar eða hundaeftirlitsmanns í Árborg, með þennan óskilagrip.

Aftur á móti er Siberian husky hundurinn, sem hvarf frá Miðdal, skammt frá Laugavatni á fimmtudag, ófundinn og sömuleiðis hreinræktaður íslenskur fjárhundur, sem hvarf frá bæ í Flóahreppi í ágúst. Grunur leikur á að þeir hafi verið tældir upp í bíla og þeim stolið. Hundaræktendur, sem fréttastofan hefur rætt við, segja að dæmi séu þess að hreinræktuðum hundum sé stolið til undaneldis.

Svo virðist sem alltaf séu til kaupendur að sérstökum hundum, þótt ættbækur fylgi þeim ekki, en slíkt fylgir að sjálfsögðu ekki afkvæmum stolinna hunda.