Sóley ósátt við Jóhönnu

Sóley Tómasdóttir, varaborgarfulltrúi Vinstri grænna, hefur ritað Jóhönnu Sigurðardóttur, félagsmálaráðherra, opið bréf vegna ákvörðunar félagsmálaráðuneytisins að fresta jafnréttisþingi fram í janúar á næsta ári.

Félagsmálaráðuneytinu þykir ólíklegt að jafnréttisþingið nái markmiðum sínum í því óvissuástandi sem nú ríkir í efnahagsmálum þjóðarinnar þar sem fjölmargir þeirra sem ráðuneytið vilji virkja þar til umræðu séu bundnir við að ráða fram úr aðkallandi úrlausnarefnum sem tengjast þeim aðstæðum sem ríkja á fjármálamarkaði.

,,Ákvörðunin og sá rökstuðningur sem fylgir veldur mér sárum vonbrigðum," segir Sóley.

Varaborgarfulltrúinn segir að femínistar og kynjafræðingar hafi bundið vonir við að fyrirhugað jafnréttisþing yrði nýtt til umræðna um þau gildi sem nauðsynlegt er að koma að í samfélagi framtíðarinnar. ,,Þar hefðu umræður um kynjaða hagstjórn, kynbundið ofbeldi, kynjað velferðarkerfi og kynjaðan atvinnumarkað átt erindi."

Viðbrögð ríkisstjórnarinnar eru ekki til marks um að breytinga sé að vænta á sviði kynjajafnréttis, að mati Sóleyjar.

,,Steininn tekur svo úr, nú þegar þú, ráðherra jafnréttismála, ákveður að fresta jafnréttisþingi og beita þér þannig beinlínis gegn því að kynjasjónarmið verði samþætt þeim aðkallandi úrlausnarefnum sem nú knýja dyra," segir Sóley.

Að lokum hvetur Sóley Jóhönnu til að endurskoða ákvörðunina og sinna skyldum sínum á sviði kynjajafnréttis því oft hafi verið þörf en nú sé nauðsyn.