Fórnarlömb Keilufellsárásar krefjast 10 milljóna í skaðabætur

Fjórir pólskir karlmenn eru ákærðir fyrir húsbrot og sérstaklega hættulega líkamsárás í Keilufelli þann 22. mars síðastliðinn.

Í ákærunni segir að mennirnir hafi, ásamt öðrum óþekktum karlmönnum, ráðist að sjö löndum sínum, slegið þá ítrekað í höfuð og víðs vegar um líkama með hættulegum vopnum og bareflum. Árásarmennirnir beittu meðal annars járnstöng, járnröri, hamri, sleggju, gaddakylfu, golfkylfu, hafnaboltakylfu, hnífi og öxi.

Mennirnir hlutu mjög alvarlega áverka af árásunum. Einn þeirra hlaut meðal annars brotin augnbotn, brotin andlitsbein, handleggsbrot og rifbrot, annar hlaut beinbrot á báðum höndum. Sá þriðji hlaut skurð á höfði, opið sár á framhandlegg og yfirborðsáverka víðs vegar um líkamann. Þrír þeirra hlutu alvarlega skurði á hnakka.

Skaðabótakröfur árásarþolanna nema alls um 10 milljónum króna. Sá sem slasaðist mest í árásinni krefst þriggja og hálfrar milljóna króna í skaðabætur.

Málið verður þingfest í Héraðsdómi Reykjavíkur á morgun.