Verð hækkar mest í lágvöruverslunum

Vörukarfa ASÍ hækkaði um 9% til 28% í helsu verslunarkeðjum frá miðjum apríl til októberloka. Mestar hækkanir á verð vörukörfunnar voru í lágvöruverðsverslunum.

Verðlagseftirlit ASÍ mælir breytingar á verði vörukörfu sem getur endurspeglað almenn innkaup meðalheimilis.

Í Kaskó hefur karfan hækkað um tæp 28% á tímabilinu, í Bónus nemur hækkunin ríflega 25% og í Nettó 21%.

Af lágvöruverðsverslunum hefur vörukarfan hækkað minnst í Krónunni um tæplega 15%.

Í öðrum verslunum hefur vörukarfa ASÍ hækkað mest í klukkubúðunum 11-11 og Samkaup-Strax og í stórmarkaðinum Samkaup-Úrval, um 18% til 19% frá því í apríl. Í Nóatúni nemur hækkun körfunnar 13% á tímabilinu og í 10-11 hefur vörukarfan hækkað um rúm 11%.

Minnst hækkun hefur orðið á vörukörfu ASÍ seinustu sex mánuði í Hagkaupum eða um tæplega 9%.