Mál Ramses skoðað á ný

Umsókn Pauls Ramses Odour um hæli hér á landi verður tekin til umfjöllunar á ný samkvæmt úrskurði dóms- og kirkjumálaráðuneytisins. Ramses var vísað úr landi í júlí síðastliðnum. Hann kærði þá ákvörðun Útlendingastofnunar að hafna því að taka til meðferðar beiðni hans um hæli hér á landi.

Dómsmálaráðuneytið fellst ekki á þau rök að málsmeðferð Útlendingastofnunar hafi verið haldin annmörkum þannig að það valdi ógildingu ákvörðunarinnar. Ráðuneytið segir hinsvegar að í ljósi nýrra upplýsinga, sem ekki hafi legið fyrir við meðferð málsins hjá Útlendingastofnun, þyki rétt að mál hans verði tekið til efnislegrar umfjöllunar hér á landi. Þessi ákvörðun er byggð á grundvelli undanþáguheimildar svonefndrar Dublinreglugerðar.

Katrín Theódórsdóttir lögmaður Ramses sagðist vera mjög ánægð með þessa ákvörðun og sagði jafnframt að hún áliti að þetta þýddi ekkert annað en að hann gæti komið strax til Íslands.