Vinir Tíbets heiðruðu viðskiptaráðherra

Samtökin Vinir Tíbets heiðruðu Björgvin G. Sigurðsson á hátíðarsamkomunni „Raddir fyrir Tíbet" sem haldin var í gær. „Ég var þarna alveg af sérstöku tilefni. Það var verið að veita mér einhverskonar viðurkenningu fyrir að hafa tekið málefni Tíbeta upp í heimsókn til Kína í vor," segir Björgvin í samtali við Vísi.

Á samkomunni í gær komu meðal annars KK, Svavar Knútur, Páll Óskar & Monica fram. Auk þess héldu þrír framsögumenn stutt erindi um Tíbet. Samkoman í gær var haldin til styrktar flóttamannamiðstöðvar í Dharamasala sem flýja Tíbet ár hvert, eftir því sem fram kemur á vefsíðu Vina Tíbeta.

Viðskiptaráðherra segir að í heimsókn sinni til Kína hafi hann fengið boð um að heimsækja Tíbet. Hann sé að íhuga að taka tilboðinu en eigi eftir að fara betur yfir málið með utanríkisráðherra.