Krónan fellur en Arctic Trucks fer í útrás

Á Íslandi ríkir nánast efnahagslegt stríðsástand þar sem íslenska krónan er í frjálsu falli. Í öllum látunum eru hinsvegar að opnast gluggar fyrir íslensk fyrirtæki en eitt þeirra er jeppamiðstöðin Arctic Trucks. Fyrirtækið sérhæfir sig í því að breyta jeppum en þessa dagana er fyrirtækið að moka út breyttum jeppum til fjarlægra landa. Jeppi á vegum Arctic Trucks eru á leiðinni á suðurpólinn þar sem á að spóla og velta sér innan um mörgæsir og grýlukerti.

Fyrirtækið vakti heimsathygli á síðasta ári þegar þeir breyttu jeppum fyrir sérstakan þátt af hinum geysivinsæla Top Gear. Jeremy Clarkson og félagar fóru þá á pólinn á íslenskum jeppum. Í tilkynningu frá fyrirtækinu segir að eftir þann þátt hafi þeim verið sýndur mikill áhugi jeppaáhugamanna víðsvegar um heim.

Þar segir einnig að undanfarin ár hafi krónan verið gríðarlega sterk og eftirspurnin hér heima mikil og því hafi fyrirtækið ekki getað sinnt þessum mikla áhuga. En þar sem ástandið hér heima sé ekki sem best hafi streymt hingað til lands erlendir bílar upp á síðkastið, sem fyrirtækið sjái síðan um að breyta og bæta af sinni alkunnu snilld.

Um helgina fer fram bílasýning í Fífunni í Kópavogi þar sem margir af flottustu jeppum landsins verða til sýnis. Meðal annars verður hægt að sjá jeppa sem kallaður er „Happy feet" og er á leiðinni á suðurpólinn í sumar. Bíllinn verður hluti af Amundsen Omega3 South Pole Race 2008.