Nektarsenur í Svörtum englum erfiðar

Vísir hafði samband við Davíð Guðbrandsson leikara sem fer með hlutverk Árna í sjónvarpsþáttaröðinni Svartir englar sem hóf göngu sína í Sjónvarpinu í gær.

„Ég ligg bara í flensu en annars hef ég það ágætt fyrir utan að það er leiðinlegt að liggja heima. Þetta gæti verið spennufall vegna þáttanna eða þessi blessaða haustbaktería," svarar Davíð aðspurður hvernig hann hefur það.

Hvernig upplifðir þú að leika í Svörtum englum?

„Mér fannst þetta mjög gaman. Ég veit ekki hvort það er klisja eða klassík að segja hvað það er gaman að fara úr leikhúsinu fyrir framan kameruna. Þar myndast öðruvísi nálægð við áhorfendur eða öðruvísi galdur í augnablikinu. Mín upplifun þegar leikstjórinn öskrar action þá er mikil krafa um að allt takist. Það er skrýtið að ganga frá þessu og vita að verkið er tilbúið og sýningar hafnar. Allt annað en í leikhúsinu því ef maður er lélegur á föstudegi og sér hvað maður gerði vitlaust þá leggur maður sig fram við að laga það á laugardegi."

Var ekkert mál að leika í nektarsenunni?

„Jú það er að sjálfsögðu mál. Ímyndaðu þér að fara úr fötunum með manni sem þú ert búin að þekkja í klukkutíma með 10 manns í herberginu. Við þannig aðstæður fara allar BA gráður út um gluggann og maður verður bara lítill feiminn strákur úr Keflavík. Eina sem hægt er að gera er að sleppa tökunum þegar það þarf að taka upp senuna," svarar Davíð.

Mega áhorfendur eiga von á fleiri nektarsenum í þáttunum?

„Það eru einhverjir berir kroppar í komandi þáttum en það verður að koma í ljós."

Ertu búinn að fá þér umboðsmann?

„Nei ertu með einhverja tillögu?" spyr Davíð að lokum.