Einn handtekinn í Helguvík

Einn aðgerðarsinni var handtekinn um það leyti sem aðgerðum var að ljúka í Helguvík í dag.

Tæplega 40 manna hópur frá Saving Iceland stöðvaði vinnu klukkan 10 í morgun með því að hlekkja sig við vinnuvélar og klifra upp í krana.

Sá sem var handtekinn hafði neitað að segja til nafns og huldi andlit sitt.

Hann reyndi að komast af vettvangi á hlaupum en lögreglan náði honum fljótlega.

Aðrir aðgerðarsinnar sögðu til nafns og framvísuðu skilríkjum þegar lögregla óskaði eftir því og var leyft að halda á brott eftir að þau höfðu losað sig frá vinnuvélum á svæðinu.

Fleiri aðgerðir gegn stóriðju eru boðaðar á næstu dögum.