Ólöf Guðný rekin úr skipulagsráði

Ólöf Guðný Valdimarsdóttir mun að öllum líkindum víkja úr skipulagsráði Reykjavíkurborgar. Hún sagði við Vísi í morgun að Ólafur F. Magnússon borgarstjóri hafi haft samband við hana í gær og hann hafi tilkynnt henni að hann myndi tilnefna nýjan fulltrúa hennar á næsta fundi borgarráðs. Borgarráð muni svo kjósa um málið.

Ólöf Guðný segir ástæðuna vera þá að henni hafi ekki fundist tímabært að taka afstöðu með eða á móti verðlaunatillögu um byggingu Listaháskóla, en borgarstjóri er á móti tillögunni í óbreyttri mynd. Ólöf Guðný sagðist vera sátt við að fara miðað við það hvernig aðstæður væri, en henni fyndist málið bera að með mjög undarlegum hætti.

24 stundir greindi frá því í morgun að Magnús Skúlason, arkítekt og fyrrverandi forstöðumaður Húsafriðunarnefndar, tæki sæti í skipulagsráði í stað Ólafar Guðnýjar.

Ólöf Guðný var aðstoðarmaður Ólafs borgarstjóra til skamms tíma en hætti vegna ósamkomulags um áherslur á viðfangsefni.