Fólk snyrti gróður sem vex út fyrir lóðamörk

Borgaryfirvöld hvetja nú borgarbúa til þess að snyrta gróður sem vex út fyrir lóðamörk og hindrar umferð eða hylur umferðarmerki.

Bent er á í tilkynningu borgarinnar að sumarið í ár hafi verið eitt það hlýjasta í sögu Reykjavíkur og víða í borginni sé fallegur og gróskumikill trjágróður. Þegar gróðurinn sé hins vegar farinn að hindra umferð á gangstéttum, götum og stígum sé hann ekki til ánægju og geti jafnvel valdið hættu ef hann hylur umferðarmerki. Það sé því miður of algengt í Reykjavík.

Bent er á að samkvæmt byggingarreglugerð beri íbúum að gæta að þessum þáttum. Ef þeir gera það ekki innan ákveðinna tímamarka og áminningu er ekki sinnt geti borgaryfirvöld látið fjarlægja þennan gróður á kostnað lóðareigenda.