Ríkið dæmt til að greiða bætur vegna hálkuslyss

Héraðsdómur Reykjavíkur dæmdi í dag íslenska ríkið til þess að dæma sjúkraliða á Heilbrigðisstofnun Suðurlands á Selfossi tæpar fjórar milljónir króna vegna vinnuslyss.

Slysið, sem átti sér stað árið 2003, var með þeim hætti að sjúkraliðinn var að ýta manneskju í hjólastól niður skrábraut sem lá út á svalir og rann sjúkraliðinn til í hálku og slasaðist á fæti. Krafði starfsmaðurinn ríkið um bætur þar sem aðbúnaði á vinnustað hefði verið ábótavant. Benti sjúkraliðinn, sem er kona, á að hún hefði orðið fyrir miklum óþægindum vegna slyssins og meðal annars þurft að minnka vinnuhlutfall sitt.

Héraðsdómur féllst á kröfu konunnar og vísaði meðal annars til álits Vinnueftirlits ríkisins á málinu. Stofnunin sagði að yfirborð á skábrautinni hefði ekki verið nógu stamt til þess að draga úr hálkumyndun. Þá hafnaði dómurinn kröfu ríkisins um að bætur konunnar yrðu minnkaðar vegna eigin sakar konunnar.