Fyrsta útkallið frá Björgunarmiðstöð Árborgar

Slökkvilið Brunavarna Árnessýslu fór í sitt fyrsta útkall frá nýrri Björgunarmiðstöð Árborgar í gær, þegar liðið fékk útkall vegna sinubruna við Tjarnarbyggð.

Björgunarfélag Árborgar, sem byggir húsið, bauð í gær sjúkraflutningamönnum og slökkviliðsmönnum að skoða aðstöðuna í húsinu, sem nú er langt komið í byggingu.

Húsið er alls tæpir 3000 fermetrar, álmurnar sem hýsa bíla og tækjakost eru úr límtré og yleiningum, en millibyggingin steypt á tveimur hæðum og kjallara. Smíðandi byggir húsið, en félagar Björgunarfélags Árborgar leggja talsverða sjálfboðavinnu í framkvæmdir innanhúss.

Húsið er nær fullbúið að utan, aðeins á eftir að steina steypta hlutann, eftir því sem fram kemur í tilkynningu.