Búðarhálsvirkjun aftur á dagskrá - orka seld til Rio Tinto Alcan

Landsvirkjun hefur ákveðið að hefja á ný framkvæmdir við Búðarhálsvirkjun í Tungná. Orkan verður seld til Rio Tinto Alcan sem mun auka framleiðslu sína í Straumsvík og til Verne Holding sem hyggst reisa netþjónabú á gamla varnarliðssvæðinu. Þetta kemur fram í tilkynningu frá félaginu.

Þar segir að fyrstu útboðsgögn vegna framkvæmdanna verði send út á mánudag en þar er um að ræða útboð á vélum og rafbúnaði. Um leið á bjóða út vél- og rafbúnað fyrir umdeildar virkjanir í neðri hluta Þjórsár. Byggingaframkvæmdir vegna Búðarhálsvirkjunar verða boðnar út í haust.

Rekstur álvers í Straumsvík tryggður til 2037

Í tilkynningunni segir enn fremur að Landsvirkjun undirbúi fjórar virkjanir á Suðurlandi, Búðarhálsvirkjun og þrjár virkjandi í neðri hluta Þjórsá, Hvammsvirkjun, Holtavirkjun og Urriðafossvirkjun.

Í nóvember í fyrra ákvað stjórn Landsvirkjunar að ganga ekki til samningaviðræðna um orkusölu til nýrra álvera á Suður- og Vesturlandi og þess í stað leita nýrra viðskiptavina. Samið hefur verið við Verne Holding um sölu á orku fyrir netþjónabú og þá standa yfir viðræður um orkusölu til kísilhreinsunar sem staðsett yrði í Þorlákshöfn.

Við þetta bætist að Landsvirkjun hefur nú samið við Rio Tinto Alcan, sem rekur álverið í Straumsvík, um orkusölu þegar framleiðslugeta álversins hefur verið aukin um 40 þúsund tonn á ári. Til þess þarf 75 megavött. Með samkomulaginu segir Landsvirkjun hækkar orkuverðið og rekstur álversins verður tryggður til ársins 2037.

Öll leyfi fyrir hendi

Til þess að útvega þessum aðilum orku þarf virkjanirnar fjórar en dóms- og kærumál eru nú yfirvofandi vegna virkjananna þriggja í neðri hluta Þjórsá. Segir Landsvirkjun að vegna þessa verði ekki hægt að bjóða út byggingarframkvæmdir vegna þeirra fyrr en í fyrsta lagi í byrjun næsta árs. Til þess að standa við samkomulagið við Verne Holding og Rio Tinto Alcan verði að ráðast aftur í framkvæmdir við Búðarhálsvirkjun en öll leyfi fyrir þeirri virkjun eru fyrir hendi.

Undirbúningsframkvæmdir við Búðarhálsvirkjun hófust sumarið 2001 en þeim var hætt þegar fallið var frá Norðlingaölduveitu, sem Landsvirkjun sagði þá að væri forsenda Búðarhálsvirkjunar. Búðarháls er á milli Sultartanga og Hrauneyjafoss. Tungná yrði stífluð neðan Hrauneyjafosssvirkjunar og leidd í fjögurra kílómetra löngum jarðgöngum í gegnum Búðarháls. Stöðvarhús yrði við ofanvert Sultartangalón. Útboðsgögn eru í vinnslu þessa dagana.

Áfram unnið að virkjunum í neðri hluta Þjórsár

„Landsvirkjun mun eftir sem áður halda ótrauð áfram undirbúningi virkjana í neðrihluta Þjórsár með það að markmiði að hrinda þeim í framkvæmd eins fljótt og unnt er. Fyrirtækið mun kappkosta að vinna að þessu markmiði í náinni samvinnu við viðkomandi sveitarstjórnir og stjórnvöld og leggja allt kapp á að ná samkomulagi við landeigendur um lands- og vatnsréttindi. Í því efni fara saman hagsmunir fyrirtækisins og íbúa á Suðurlandi," segir að endingu í tilkynningu Landsvirkjunar.