Landlæknir styður breytingarnar á neyðarbílnum og hvetur til sátta

Sigurður Guðmundsson, landlæknir, segir að faglegar forsendur ákvörðunarinnar um að breyta fyrirkomulagi við mönnun neyðarbílsins hafi verið réttar. Þetta kemur fram í grein sem Sigurður skrifar á vef Landlæknisembættisins. Hann segist einnig ávallt hafa stutt þessar breytingar og talar fyrir því að um þær náist sátt.

Í greininni fer hann yfir málið í heild sinni en nokkur gagnrýni hefur verið uppi um þá ákvörðun að hætta að manna neyðarbílinn með lækni eins og áður tíðkaðist. „Í þá tæpa tvo mánuði sem liðnir eru frá því að breyting þessi tók gildi hafa sjúkraflutningar og viðbrögð við bráðavanda á höfuðborgarsvæðinu gengið vel," segir Sigurður. „Læknir hefur verið kallaður út að meðaltali einu sinni á sólarhring, í samræmi við verklagsreglur, en snúið við áður en á útkallsstað kom í um það bil helmingi þeirra tilvika. Vel er fylgst með ferli og árangri flutninga á hverjum degi og sérstök úttekt verður gerð innan tíðar á fyrstu vikum og mánuðum eftir breytingarnar."

Þá segir landlæknir að hann hafi stutt þær breytingar sem orðið hafi á starfsseminni og faglegar forsendur þeirra, „enda verður ekki séð að öryggi sjúklinga sé stefnt í hættu með þeim, heldur sé hér frekar stigið skref til bættrar nýtingar þeirrar þjónustu og mannafla sem við höfum yfir að ráða. Miklu máli skiptir að um breytingarnar náist sátt, en það verður ekki gert nema að umfjöllun og fréttaflutningur sé í eðlilegu jafnvægi," segir Sigurður Guðmundsson, landlæknir.

Grein Sigurðar má lesa í heild sinni hér.