Lögreglan með eftirlit um helgina

Lögreglan á höfuðborgarsvæðinu verður með viðamikið eftirlit um verslunarmannahelgina eins og jafnan áður. Kappkostað verður að umferðin til og frá höfuðborgarsvæðinu gangi greiðlega fyrir sig en búast má við töluverðri umferð því veðurútlit er ágætt. Þetta kemur fram í tilkynningu frá lögreglunni.

Lögreglan segist hafa haldið úti öflugu umferðareftirliti í sumar en lögregluliðin á suðvesturlandi hafa átt mjög gott samstarf í þeim efnum. Því verður haldið áfram framhaldið en um verslunarmannahelgina njóta lögregluyfirvöld að auki liðveislu Landhelgisgæslunnar sem leggur til þyrlu.

Jafnframt mun lögreglan halda úti eftirliti í öllum hverfum umdæmisins. ,,Það er fátt óskemmtilegra en að koma heim úr ferðalagi og verða þess var að innbrotsþjófar hafi látið greipar sópa um heimilið. Af þeirri ástæðu munu lögreglumenn fylgjast grannt með íbúðarhúsnæði um verslunarmannahelgina en við eftirlitið verður notast við bæði merkta og ómerkta bíla. Lögreglan vill jafnframt hvetja fólk, sem heldur burt af höfuðborgarsvæðinu í lengri eða skemmri tíma, til að ganga tryggilega frá heimilum sínum. Gott ráð er biðja nágranna um að líta eftir húsnæði. Fá þá til að kveikja ljós, fjarlægja póst, leggja í bílastæði o.þ.h." eins og segir í tilkynningunni.