ESB segir ómögulegt að taka upp evru á grundvelli EES samningsins

Percy Westerlund, yfirmaður fastanefndar framkvæmdastjórnar ESB gagnvart Íslandi, telur það ómögulegt að Íslendingar geti tekið upp evru á grundvelli EES samningsins. „Ég held að það hafi þegar verið gert ljóst í allri umræðunni um einhliða upptöku evru að Íslendingar geta ekki tekið upp evruna án þess að ganga í ESB," segir Westerlund í samtali við Vísi.

Westerlund segir að umræða um að taka evruna upp á grundvelli EES samningsins sé jafnvel enn óskiljanlegri heldur en umræða um einhliða upptöku myntarinnar. „EES samningurinn snýst ekki að neinu leyti um myntbandalag," segir Westerlund. Hann telur að öll EFTA ríkin þyrftu að samþykkja slíkar breytingar og ólíklegt að Norðmenn tækju þátt í slíkum breytingum.

„En jafnvel þó að slíkur myntsamningur á grundvelli EES væri mögulegur fræðilega, þá myndi slíkur samningur aldrei verða að veruleika því að ESB myndi aldrei samþykkja hann," segir Westerlund.