Enn tíðindalaust úr Ráðhúsinu

Þögnin ein hefur heyrst frá meirihlutanum í borgarstjórn í kvöld þrátt fyrir ítrekaðar tilraunir Vísis við á ná í borgarstjórnarfulltrúa Sjálfstæðisflokksins og Ólaf F. Magnússon, borgarstjóra.

Ólafur fór yfir sín mál á skrifstofu sinni í Ráðhúsinu fram eftir kvöldi, m.a. með Jakobi Frímanni Magnússyni, miðborgarstjóra, en um næstu skref hans er enn allt á huldu.

Ekki er vitað hvar sjálfstæðismenn funduðu en samkvæmt heimildum Vísis funduðu borgarfulltrúar flokksins stíft saman í kvöld. Líklegra þykir en ekki að flokkurinn slíti samstarfinu við Ólaf og leiti til Framsóknarflokksins um myndun nýs borgarmeirihluta.

Sögusagnir voru uppi um að samstarfinu yrði slitið strax í kvöld en af því varð ekki.

Óskar Bergsson, eini borgarfulltrúi Framsóknar, neitar alfarið fyrir að óformlegar eða formlegar viðræður hafi átt sér stað milli hans og fulltrúa Sjálfstæðisflokksins.