Ungir jafnaðarmenn hyggja á mótmæli við meirihlutaskipti

Anna Pála Sverrisdóttir, formaður Ungra jafnaðarmanna, segir það vel geta farið svo að hún muni standa að mótmælum í Ráðhúsinu næstkomandi fimmtudag, þegar nýr meirihluti tekur við í borgarstjórn. „Það getur meira en vel verið, án þess að ég ætli að fara að upplýsa um það núna hvernig það verði gert," segir Anna Pála í samtali við Vísi.

Anna Pála stóð ásamt fjölda annarra að mótmælum í Ráðhúsinu þegar meirihluti F-lista og sjálfstæðismanna tók við völdum. Þá mættu hundruð Reykvíkinga til þess að láta í ljós óánægju sína. Anna Pála segist allt eins eiga von á því að jafn margir taki þátt í mótmælum núna. „Það eru í það minnsta jafn margir reiðir. Og fólk þarf að passa sig á því að láta það í ljós þegar það er ekki sátt. Það er aðhaldið sem við höfum fyrir utan kosningar á fjögurra ára fresti," segir Anna Pála.

Anna Pála vísar í ályktun sem Hallveig, félag ungra jafnaðarmanna í Reykjavík, samþykkti nýlega þar sem stungið er upp á því að þingmenn setji bráðabirgðalög um kosningar. „Ég er ekki endilega að tala um að breyta sveitastjórnarlögum þannig að lítil sveitafélög úti á landi geti efnt til kosninga á hálftíma fresti. En aðstæður í Reykjavík kalla á bráðabirgðalög þannig að hægt verði að kjósa núna," segir Anna Pála.

Anna Pála segir það kaldhæðnislegt að yfirskrift yfirlýsingar sjálfstæðismanna og framsóknarmanna sé „Höldum áfram" í ljósi þess hvernig saga þessa kjörtímabils hafi verið.