Fjármálaráðuneytið bjartsýnna en Seðlabankinn í fasteignamálum

Í Þjóðarbúskapnum, þjóðhagsspá fjármálaráðuneytisins er því spáð að fasteignaverð muni lækka um 16 til 17 prósent fram til ársins 2010. Þetta er um helmingi minni lækkun en Seðlabankinn gerir ráð fyrir í nýjustu útgáfu Peningamála.

Ráðuneytið gerir ráð fyrir 0,5 prósenta hagvexti í ár. Gert er ráð fyrir að ál útflutningur aukist um 70 prósent en að innflutningur muni dragast saman. Á næsta ári mun hagvöxturinn dragast saman um 0,7 prósent og er þó gert ráð fyrir álversframkvæmdum í Helguvík en þetta er í fyrsta sinn sem sú framkvæmd er tekin inn í þjóðhagsspá. Árið 2010 er síðan gert ráð fyrir 0,8 prósenta hagvexti.

Viðskiptahallinn mun að mati ráðuneytisins dragast saman. Hann verður 13,2 prósent í ár en árið 2010 verður hann orðinn 6,6 prósent.

Gert er ráð fyrir 1,9 prósent atvinnuleysi í ár, 3,8 prósent á næsta ári og 3,5 prósentum árið 2010.

Verðbólgan verður samkvæmt spánni 8,3 prósent í ár og síðan er gert ráð fyrir að hún fari minnkandi. Spáð er 3,9 prósenta verðbólgu á næsta ári og ráðuneytið gerir ráð fyrir að verðbólgumarkmiðum Seðlabankans, 2,5 prósent, verði náð árið 2010.

Í fráviksspá ráðuneytisins þar sem gert er ráð fyrir frekari stóriðjuframkvæmdum á borð við stækkun í Straumsvík, álveri á Bakka og stóriðju í Þorlákshöfn, breytist staðan nokkuð og gert ráð fyrir um 1,5 prósent hagvexti á tímabilinu.

Þá er bent á að helstu óvissuþættir sem áhrif geta haft á spánna séu ástand á alþjóðlegum fjármálamörkuðum, gengi krónunnar, frekari stóriðjuframkvæmdir og endurnýjun kjarasamninga hins opinbera á þessu ári.

Þjóðhagspánna má sjá hér.