Landsmönnum fjölgaði um nærri tvö prósent í fyrra

Landsmenn voru 313.376 samkvæmt samantekt Hagstofunnnar um fólksfjölgun á Íslandi. Samkvæmt þessu fjölgaði landsmönnum tum 1,9 prósent á árinu 2007 sem er töluverð fjölgun.

Hún var þó minni en árin tvö þar á undan en árið 2006 var hún 2,6 prósent sem er með því mesta sem mælst hefur. Fólksfjölgun undanfarinna ára má öðru fremur rekja til fólksflutninga til landsins að sögn Hagstofunnar.

Mest hefur fólki fjölgað í þéttbýli í nágrenni höfuðborgarsvæðinu. Þannig er fólksfjölgun mikil á Suðurnesjum og í þéttbýlisstöðum á Suður- og Vesturlandi. Á Austurlandi fækkaði íbúum árið 2007 eftir mikla fólksfjölgun árin þar á undan.

Þá kemur fram í tölum Hagstofunnar að hlutfall aldraðra hér á landi sé lægra en víða í öðrum Evrópuríkjum en hlutfall barna að sama skapi hærra. Hlutfall fólks á vinnufærum aldri hafi aldrei verið hærra á Íslandi en nú. Það megi að einhverju leyti rekja til þess að flestir erlendir ríkisborgarar sem búsettir séu hér á landi séu á þrítugs- og fertugsaldri. Fá börn og hverfandi fáir aldraðir einstaklingar eru hins vegar með erlent ríkisfang.