Framfærsla eldri borgara hækki

Stjórn Landssambands eldri borgara telur að framfærsluviðmið fyrir eldri borgara eigi að miða við neyslukönnun Hagstofu Íslands. Þetta kemur fram í ályktun sem stjórnin sendi frá sér í dag. Borgþór S. Kjærnested, framkvæmdastjóri LEB, sagði í samtali við Vísi að ,,eitthvað verði að gera."

Í greinargerð sem fylgir með ályktun FEB segir að samkvæmt síðustu neyslukönnun Hafstofunnar frá því í desember nemi meðaltals neysluútgjöld einhleypinga 226.000 krónur á mánuði fyrir utan skatta. Borgþór segir lægstu tekjur eldri borgara vera rúmlega 100.000 krónum minna. Sumir útgjaldaliðir eru hærri hjá eldri borgurum en almennt gerist svo sem læknis- og lyfjakostnaður.

Stjórn FEB beinir því til félags- og tryggingamálaráðherra að koma kröfu félagsins á framfæri við endurskoðunarnefnd almannatryggingalaga. ,,Við erum búin að eiga í viðræðum við ráðamenn í gegnum árin," segir Borgþór en hann kveðst bjartsýnn á að ráðherra bregðist vel við.

Ályktun Landssambands eldri borgara:

„Stjórn Landssambands eldri borgara telur að við ákvörðun á framfærsluviðmiði fyrir eldri borgara eigi að miða við neyslukönnun Hagstofu Íslands. Stjórn FEB beinir því til félags- og tryggingamálaráðherra að koma þessari kröfu á framfæri við endurskoðunarnefnd almannatryggingalaga en nefnd þessi á að ákveða lágmarks framfærsluviðmið fyrir lífeyrisþega fyrir 1. júlí. Stjórn LEB telur fráleitt að tekið sé upp lágt og sértækt framfærsluviðmið, sem sé úr takti við framfærslukostnað og meðaltals neysluútgjöld."