Hópur fólks úr atvinnulífinu setur fram Nóvemberáskorunina

Hópur fólks úr ólíkum kimum atvinnulífsins og með ólíkan bakgrunn í stjórnmálum hefur sent áskorun til íslenskra stjórnvalda þar sem krafist er brýnna aðgerða í efnahagsmálum og utanríkismálum í ljósi þeirrar afar erfiðu stöðu sem komin er upp í íslensku samfélagi. Áskorunin hefur fengið nafnið Nóvemberáskorunin og í henni stjórnvöld hvött til að hefja þegar aðildarviðræður við ESB og koma strax fram með nýja efnahagsstefnu.

 

,,Nú eru örlagatímar í sögu íslensku þjóðarinnar. Við viljum knýja ráðamenn til tafarlausra aðgerða varðandi þessi brýnu viðfangsefni áður en nóvember er liðinn!" segir í tilkynningu um málið. Eru allir sem sammála eru áskoruninni beðnir um að sýna stuðninginn í verki, meðal annars með mæla fyrir áskoruninni á opinberum vettvangi eða senda áskorunina með persónulegum skilaboðum til þingmanna og ráðherra.

 

 

Texti 'Nóvemberáskorunarinnar' er eftirfarandi:

 

 

,,Íslendingar hafa orðið fyrir þungbæru áfalli. Afleiðingarnar láta engan ósnortinn. Einstaklingar, fjölskyldur og fyrirtæki eru dæmd til að bera þungar byrðar, hvort sem þau áttu sök á óförunum eða ekki. Þjóðin þarf á vegvísi að halda sem markar leiðina til framtíðar. Við krefjumst þess:

 

 

- að íslensk stjórnvöld lýsi því yfir með afgerandi hætti að þau ætli að taka upp viðræður við Evrópusambandið um fulla aðild og upptöku evrunnar svo skjótt sem auðið er. Kanna þarf af alvöru hvaða valkosti þjóðin hefur í stöðunni; hún á rétt á að kjósa beint og milliliðalaust um Evrópumálin.

 

 

- að íslensk stjórnvöld setji fram skýra efnahagsstefnu og skipi strax nýja, faglega yfirstjórn Seðlabanka Íslands. Á alþjóðavettvangi eru Íslendingar rúnir trausti á sviði efnahags- og peningamála; senda þarf ótvíræð skilaboð um að þar verði snúið við blaðinu.

 

 

- að Alþingi mæli með lögformlegum hætti fyrir um gagngera úttekt, undir forystu erlendra aðila, á aðdraganda þeirrar kreppu sem Íslendingar standa frammi fyrir og þeim ráðstöfunum sem hafa verið gerðar í framhaldi af hruni íslensku bankanna. Tryggja þarf réttlæti; sagan má ekki endurtaka sig.

 

 

Ályktunin er þegar aðgengileg á síðunni askorun.blogspot.com og við munum opna vefsíðuna www.novemberaskorunin.com næstu daga."