Segir almenning vilja Vilhjálm út og Hönnu Birnu inn

Einar Mar Þórðarson stjórnmálafræðingur segir að ljóst sé að það sé krafa almennings að ,,bundinn verði endi á leiðtogakreppuna í Sjálfstæðisflokknum" og að ,,Vilhjálmur fari út og Hanna Birna taki við." Þetta komi skýrt fram í skoðanakönnum sem gerð var fyrir Capacent.

Í skoðanakönnun sem Capacent Gallup gerði fyrir Stöð 2 og var birt sl. sunnudag kom fram að þegar spurt var: ,,Hvern finnst þér að Sjálfstæðisflokkurinn ætti að velja sem næsta borgarstjóra Reykjavíkur?" að Hanna Birna Kristjánsdóttir naut rúmlega 57% stuðning, Gísli Marteinn Baldursson 11% og Vilhjálmur Þ. Vilhjálmsson 5%.

Staða Vilhjálms er veik og það vekur athygli Einars að ,,leiðtogi andstæðinganna njóta meira fylgis en Vilhjálmur" en samkvæmt skoðanakönnuninni svöruðu 8% aðspurðra að þau vildu að Dagur B. Eggertsson, oddviti Samfylkingarinnar, tæki við sem næsti borgarstjóri Reykjavíkur fyrir hönd Sjálfstæðisflokksins.

Einar segir stöðu Sjálfstæðisflokksins í Reykjavík ,,afskaplega erfiða" og það hljóti að vera mikið áfall fyrir flokkinn að vera kominn niður fyrir 30% í könnun. Sjálfstæðisflokkurinn geti ekki annað en tekið ,,skilaboðin frá almenningi mjög alvarlega og bundið enda á þessa leiðtogakreppu." Einar bendir jafnframt á að þegar einhver ákvörðun hafi verið tekin þurfi Sjálfstæðisflokkurinn tíma til að jafna sig. Því lengri sem sá tími er því betra.