Mótmælir tilhæfulausri uppsögn forstjóra OR

Óskar Bergsson borgarfulltrúi Framsóknarflokksins mótmælir tilhæfulausri uppsögn forstjóra Orkuveitu Reykjavíkur sem hann segir Sjálfstæðisflokkinn og F-listann bera fulla ábyrgð á.

„Frá því að Sjálfstæðisflokkurinn og F-listinn tóku við stjórnartaumum í Orkuveitu Reykjavíkur og REI hafa fyrirtækin mátt þola árásir og ófrægingarherferð pólitískrar yfirstjórnar," segir bókun sem Óskar lét bóka á borgarstjórnarfundi í dag. Þar segir ennfremur:

„Stjórnarformaður Orkuveitunnar hefur ekki rökstutt ákvörðun sína um uppsögn forstjórans. Hann hefur ekki gert grein fyrir því hver taki við stjórninni. Hann hefur ekki svarað því hvernig eigi að fjármagna þau verkefni sem hann sjálfur hefur skrifað undir. Ekki koma skýr svör um hvort halda eigi áfram með fleiri verkefni og því er óvissa hjá öllum meginstoðum fyrirtækisins.

Þegar þessi atburðarrás er tekin saman þá kemur í ljós að engin ástæða er gefin upp fyrir uppsögn forstjóra, engin áform um að ráða í stöðuna og engin stefna gefin upp fyrir fyrirtækið. Eftir rúma þrjá mánuði er búið að rústa fyrirtækið REI og stórskaða Orkuveitu Reykjavíkur sem hefur verið í fararbroddi í þróun, nýsköpun og atvinnuuppbyggingu samhliða kjarnastarfsemi sinni.

Það er óhætt að segja að verkin tali þegar verk meirihluta Sjálfstæðisflokks og F-lista eru skoðuð. Orkuveita Reykjavíkur fer ekki varhluta af því."