Ráðist gegn fíkniefnavandanum á Norðurlandi

Björn Bjarnason dóms- og kirkjumálaráðherra, Haraldur Johannessen ríkislögreglustjóri og lögreglustjórarnir á Akureyri, Blönduósi, Húsavík og Sauðárkróki skrifuðu í dag undir samkomulag um sérstakt samstarfsátak lögreglunnar gegn fíkniefnavanda á Norðurlandi.

Fram kemur í tilkynningu frá dómsmálaráðuneytinu að lögregluliðin fjögur muni vinna mun meira saman og verður komið á fót sérstöku þriggja manna lögregluteymi við rannsóknardeild lögreglunnar á Akureyri ásamt lögreglumanni með fíkniefnahund. Verða tveir lögreglumannanna í teyminu frá sérsveit ríkislögreglustjóra.

„Starfsstöð fíkniefnateymisins er í lögreglustöðinni á Akureyri en umboð þess nær til allra lögregluumdæmanna fjögurra á Norðurlandi. Með samstarfinu er stefnt að því að efla styrk og samtakamátt lögregluliðanna fjögurra og herða þannig baráttuna gegn innflutningi, dreifingu og neyslu fíkniefna," segir í tilkynningu ráðuneytisins.