Æra íslenskra karla vegi þyngra en virðing erlendra kvenna

Femínistafélag Íslands lýsir undrun og vonbrigðum vegna nýfallins dóms Héraðsdóms Reykjavíkur um meiðyrðarmál Ásgeirs Þórs Davíðssonar gegn fyrrverandi forsvarsmönnum tímaritsins Ísafoldar. Þetta kemur fram í ályktun sem félagið sendi frá sér. Femínstafélaginu þykir einsýnt að dómurinn ,,endurspegli virðingu fyrir æru íslenskra karla umfram virðingu fyrir erlendum konum, og virðingu fyrir peningum á kostnað mannréttinda."

Félagið telur ljóst að Héraðsdómur hafi litið fram hjá sérfræðiþekkingu í málfaflokknum sem og alþjóðlega viðurkenndri skilgreiningu á mansali.

Ásgeir Þór Davíðsson, oft nefndur Geiri í Goldfinger, segir í samtal við DV í dag að í ljósi dómsins íhugi hann málsókn gegn femínistum vegna ummæla sem þeir hafi látið falla um sig.

Í samtali við Vísi segist Guðný Gústafsdóttir hjá Femínstafélagi Íslands undrast yfirlýsingu Ásgeirs um hugsanlega málsókn. Guðný gefur lítið fyrir þau orð og segist halda að Ásgeir sé einungis að leita af athygli og undrast hversu greiðan aðgang hann eigi að fjölmiðlum með yfirlýsingar sínar.