Geir veldur Valgerði vonbrigðum

Valgerður Sverrisdóttir, varaformaður Framsóknarflokksins, gerir viðtal Markaðarins í dag við Geir H. Haarde forsætisráðherra að umfjöllunarefni í nýjum pistli á heimasíðu sinni.

,,Hann segir frá því í upphafi viðtalsins að hann hafi gaman af að leysa þrautir. Ég hóf því lesturinn ákaflega spennt og átti von á að eitthvað kæmi fram sem staðfesti þetta. Því er fljótsvarað að ég varð fyrir miklum vonbrigðum. Fátt nýtt kom fram í viðtalinu nema ef vera skyldi að það teldist frétt að heildsölubanka fyrirkomulagi Íbúðalánasjóðs hefur verið troðið niður um kokið á Jóhönnu Sigurðardóttur," segir Valgerður.

Valgerður segir að Fréttablaðið hafi gert talsvert úr orðum Geirs varðandi aðlögun að Maastricht-skilyrðunum en hún segir að það sé ,,ekkert annað en ekki-frétt" af því að Geir gæti þess að orða hlutina með þeim hætti. Ríkisstjórnin muni uppfylla öll skilyrðin ef hún nær þeim árangri sem stefnt er að í stjórnarsáttmálanum. ,,Sem sagt, gamla þulan endurtekur sig að öðru leyti en því að hann talar ekkert um það núna að kannski væri bara skynsamlegast að taka upp dollar."

,,Geir segir að það sé liðin tíð að koma með efnahagsaðgerðapakka af hálfu ríkisstjórna eins og tíðkaðist áður. Hann telur að peningamálastjórnin sé í lagi og að hann hafi ekki „meint neitt mjög mikið með því" þegar hann sagði á aðalfundi Seðlabankans að hún þyrfti skoðunar við," segir Valgerður.

Skrif Valgerðar Sverrisdóttur er hægt að nálgast hér.