Trúir ekki að þetta sé tónninn í Ýmismönnum

Undrun, segir Þór Jónsson, upplýsingafulltrúi Kópavogsbæjar, eru fyrstu viðbrögðin við afstöðu forsvarsmanna Siglingafélagsins Ýmis.

„Við trúum því eiginlega ekki að þetta sé tónninn í forystu Siglingaklúbbsins Ýmis. Það sem gerðist þarna var að settir voru niður gámar í bráðabirgðaaðstöðu félagsins sem lokuðu akstursleið íbúa bryggjuhverfisins. Við það varð að sjálfsögðu ekki unað enda voru gámarnir ekki á þeim stað sem um var samið," útskýrði Þór sem segir íþróttafulltrúa hafa farið á vettvang með starfsmönnum bæjarins í dag. Hafi þeir lagað til á svæðinu og næst sé ætlunin að afmarka aðstöðu siglingaklúbbsins með girðingum svo ekki verði ekið inn á svæðið.

Þór segist einkum undrast að þessi ummæli Ýmismanna komi fram núna, „fáeinum dögum áður en taka á skóflustungu fyrir ekki 300 fermetra, eins og talað var um, heldur 400 fermetra aðstöðu sem Siglingaklúbburinn Ýmir fær á nýjum stað. Af hverju er ekki þegar búið að reisa það? Af því að þetta fer á púða sem er á uppfyllingu sem er ekki nægilega sigin til að hægt sé að byggja á honum," útskýrir Þór og bætir því við að það sé vilji Kópavogsbæjar að gera íþrótta- og tómstundamannvirki í bænum sem best úr garði. „Það stendur því alls ekki til að koma eitthvað ræfilslega fram við siglingaklúbbinn," sagði Þór að lokum.