Fundu hundrað grömm af amfetamíni á tveimur stöðum

Lögreglan á höfuðborgarsvæðinu lagði á föstudag hald á um 50 grömm af amfetamíni við húsleit í Breiðholti. Þrír karlar og ein kona voru handtekin vegna rannsóknar málsins.

Á fimmtudagskvöld fannst ámóta magn af ætluðu amfetamíni við húsleit í Árbæ en um tíu önnur fíkniefnamál komu til kasta lögreglunnar á höfuðborgarsvæðinu þessa umræddu daga. Í öllum tilvikum var lagt hald á ætluð fíkniefni, mismikið þó.Fyrrnefndar aðgerðir eru liður lögreglu í að hamla gegn sölu og dreifingu fíkniefna eftir því sem segir í tilkynningu lögreglu.