Gísli: Borgarstjórnarflokkurinn styður mig

Gísli Marteinn Baldursson, borgarfulltrúi, segir að borgarstjórnarflokkur Sjálfstæðisflokksins styðji sig einhuga en nýverið greindi Gísli frá því að í vetur hyggst hann stunda nám í borgarfræðum við Edinborgarháskóla. Gísli mun ekki gegna nefndarstörfum á meðan en starfa áfram á vettvangi borgarstjórnar.

Fyrr í dag í samtali við Vísi gagnrýndi Sveinn Andri Sveinsson, hæstaréttarlögmaður og fyrrverandi borgarfulltrúi Sjálfstæðisflokksins, Gísla Martein harðlega fyrir að ætla að sinna borgarfulltrúastörfum frá Edinborg. Sveinn Andri sagði að margir sjálfstæðismenn í borginni væru afar óánægðir með ákvörðun Gísla og hann sagðist treysta því að borgarstjórnarflokkur sjálfstæðismanns ,,vindi ofan þessari hugmynd."

Gísli segir að fjölmörg dæmi séu fyrir því að borgar- og bæjarfulltrúar sinni öðrum störfum eða námi á meðan að þeir gegna störfum sem kjörnir fulltrúar. Hann bendir meðal annars á að Ingibjörg Sólrún Gísladóttir hafi verið borgarfulltrúi á meðan að hún var í námi við London School of Economics árið 2004.

,,Ég man ekki til þess að fjölmiðlar eða aðrir hafi gert athugasemdir við það. Þvert á móti var fjallað frekar lofsamlega um það skref hjá henni að afla sér aukinnar menntunar og reynslu á erlendum vettvangi. Fleiri borgarfulltrúar hafa verið í öðrum störfum en sinnt borgarfulltrúaembættinu samhliða. Sumir með því að mæta bara á borgarstjórnarfundi en aðrir tekið að sér önnur hlutverk líka," segir Gísli.

Gísli sótti um inngöngu í Edinborgarháskóla fyrir rúmlega hálfu ári síðan og hann segir námið í borgarfræðum leggist afar vel í sig. Seinustu misseri hefur Gísli nýtt til að ljúka við BA-gráðu sína í stjórnmálafræði.